Discriminación hinataq racismo nisqakuna ima kasqan
Racismo, discriminación nisqakunaqa runakunapa sasachakuyninmi, Perú suyupi kimsa kaq parten runakunatam sasachayman churan, I Encuesta Nacional: Percepciones y Actitudes sobre Diversidad Cultural y Discriminación Étnico-Racial del Ministerio de Cultura del 2018 nisqapa willakusqanmanhina. Kay sasachakuykuna ima kasqanta yachanapaq chaymanta allichanapaq kay willakuykuna qatimun.
Discriminación étnico-racial imaynakuna kasqan
Discriminaciónqa rikchaqmanam kanman, kayqa, runamasinchikta hukniraqtahina qawaymi hinataq mana allin qaway, ñawpa sapiyuq llaqtamanta kasqanrayku utaq imayna rikchayniyuq kasqanmanta hukniraqtahina qawaymi hinataq aycha qaranpa llimpinta qawaspa.
- Huk niraqtahina qaway: Runamasinchikta hukniraqtahina qaway, chaywan nanachiy utaq sasachayman churaymi. Kaynam, mana allintachu rimapayasunki, mana yanapasunkichu, utaq yanapasunki hukniraqtahina qawaspa, ñawpa sapiyuq llaqtamanta kasqaykirayku, rikchayniykita, aycha qaraykipa llimpinta qawaspa.
- Nanachiykuna: Ñawpa sapiyuq llaqtamanta kasqanrayku runamasinchikta maqaptin utaq simiwanpas nanachiptin, takaspa, haytaspa, qaqchaspa, kamispa chayna hukkunawanpas.
- Llaqtanpa yachayninkuna riqsichiypi: Pipas utaq kamachiqpas, yachayninku riqsichinanta harkakuptin, mana chaninchaptin utaq pinqachiptin. Kaynaspan, mama siminkupi rimananta mana munaspan, llaqtanmanta kaq pachankuwan churakunanta nitaq llaqtankupa huk riqsichikuyninkunatapas harkakuptin.
Racismo
Racismoñataqmi, raza nisqankumanhina runakuna rakisqa kananta hamutay, hinaptin wakin runakuna allinnin kanman ninku.
Chaymi nichwan: racismoqa hamutay kasqanta, discriminaciónñataq imapas rurayña kasqanta.